فمان الله يا دربٍ على الهجر يتحراني
خذاه الوقت من جنبي و لا جاني و لا جيته
قصيدي يا قصيدي إسكن فقلبي طرف ثاني
قبل يسكن بيوتي جِنه و تمسي عفاريته
تعال إسال نجوم الليل يا هاجر من الهاني
و انا اعلمك بالوقت الطويل و كيف قضيته
بغيت اقوى على بعدك و راح الصبر ما امداني
أهز الشوق و ان طاح الوله بالحضن ضميته
ربيعي يا خريفي يا شتاي و صيفي الهاني
تراك انت الفصول و هِجرة الشاعر و تشتيته
فضت كل الشوارع ما لقيت اللي يترياني
مثل طفلٍ طلع يلعب و رد و ما لقى بيته
تحداني تحداني حبيبي لا تحداني
أنا لولاك لحن الهجر و الفرقى ما غنيته
تمنيتك و قلت فخاطري ليته تمناني
و انا ما كل واحد شافته عيني تمنيته
على كيفك تذكرني على كيفك تناساني
و انا طاريك و لا يوم في قلبي تناسيته
زرعتك وردةٍ حمرا تزين كل بستاني
و دفنت القلب في قربك مشاعرنا و خليته
أنا المجني عليه اللي يقدر طعنة الجاني
لأن جرحه يذكرني بطاريه لى حسيته
فمان الله يا دربٍ على الهجر يتحراني
خذاه الوقت من جنبي و لا جاني و لا جيته