هاجس بالضماير
يامل قلبٍ يسج وفيه دولاجه
من هاجسٍ بالضماير قام يدرجها
في معزلٍ عن جميع الخلق وازعاجه
ماسمع من الناس لو تكثر لجالجها
ماغير ادوج تقول مضيعٍ حاجه
وآخذ واسند على روحي واهرجها
وادوج الرجل لو ماهي بدواجه
أدله النفس لين الله يفرجها
يالله ياللي بيدك الضيق وافراجه
ياخالق الخلق ياقاضي حوايجها
ألطف بعينٍ ليا لدن بسوهاج
تزعج عليها التواري لين تزعجها
بالصدر ضيقه ودمع العين هملاجه
عيني من العام والسهر امتولجها
نوبٍ سهرها شديد ونوب نهاجه
مرٍ تكن الدموع ومر تزعجها
عليك ياللي بقلبي كن وهاجه
وهاج نارٍ هوى الغربي يسارجها
أبو ثمانٍ تشاد اللول لعاجه
كن البرد يوم تضحك في مفالجها
ياروح روحي وطب القلب وعلاجه
ألطف بحالٍ عليك الهم ساهجها
قلبٍ يناجيك بسلوم العرب ناجه
يشكي لك الحال داخلها وخارجها
أما التفت له وتم الوصل بمواجه
ولا بلا عشرةٍ هذي نتايجها
وش ينفعك من حنين القلب واخلاجه
وجروحي أسبابها أنت ولا تعالجها
عبد الله بن عون الرويس