سواليف وعلوم الويك اند مع دلة قهوه

يا مرحبا ويا مسهلا :msa (40):
هذا الموضوع للسواليف والعلوم واي موقف جميل ويحتاج الى مشاركات الجميع ماذا عمل الليله
انا ياجماعة الخير واعوذ بالله من كلمة انا ساكن بالرياض وعندنا حر وشمس لا يعلمها الا الله
والله يلطف لا نحترق :msa (11):, اصبح وجه الواحد فينا تقول لستك سياره من الحراره:msa (37):
رجعت من الدوام عصر وهاك من الغدا لين كنت ابنفقع وبعدها شربت مويه مع ببسي دايت حتى تبخرت الغازات من راسي :msa (0):
وبعدها بطحة نومه الى الساعه 6 مغرب فتحت الجوال مامداني الا واحد من الشباب داق يقول
وش رايك نطلع شوف المباراه حقت السعوديه وكوريا ش قلت افا يالعلم يالله يالله
والعيال وين نحطهم قال بالبرجون قلت ابشر والله واصلي المغرب بعد مادخلت تصفحت المنتدى شي 10 دقايق (متاثر باللهجه اللبنانيه عشان اخر موضوع نزلته حق الطالب):msa (31):
وبعدها قلت للمره يالله على البرجون تقابلين نسوان الرياض كلهم
والله وادعس بالسياره واحطها في رقم واحد (شايب) ثم 2 ثم 3 ثم4 ( ابغى اطول السالفه):msa (37):
ومع صلاة العشاء الا يوم تقابلنا عند البراجون انا وخوي السعد ونزلنا العيال ونركب بسياره واحده وين وين يالكوره والمنتخب السعودي وعندكم واحد يحب الكوره ما شاء الله مشجع رقم 1:msa (38):
رحنا عند شباب عزابيه ومعنا ترمس شاهي وقهوه واخذنا حلويات بالقشطه وعلى هالمباراه
والله اشوف الشباب صياح وتشجيع وانا قاعد اقرط في الحلا لين قلت امين:msa (7):
وطالع معهم اخر لحضه بالمباراه يوم السعوديه دخلت قول واقوم اصيح وانقز والشباب يطالعون فيي وش فيك يالاخو قلت هدف وش فيكم قالو اجلس الله يرحم والديك وكمل الحلا قلت افاااااا ماهو هدف على بالي اني ذيب:msa (38): قالوا لا قلت ليش ماعلمتوني من اول راح الحلا مع التنقيز والصياح على بالي متحمس :msa (37):
خلصت المباراه قالوا الشباب العشاء قلنا حنا ورانا عيال (ما نبغى نكلف عليهم ) واحد فاهم:msa (16):

دعست انا وخويي قلت يالله الديار تبغى اهلها وبسم الله وبسم الله حتى قلت وقف ياذيبان قال وش فيه قلت على الملازيم يا عشاك انه علي قال سم قلت على مندي ديرتي
والله وعلى طويلة الاعناق حبه مع 2 ببسي وامسك الشطه وكب نصفها على الرز عشان يعطي نكهه:msa (0):
واصيح على اليماني قلت افا ما عندكم بصل قال اجيبلك الحين قلت مثل الذيب يا طير شلوى
هبدنا في العشاء لين الضلعان تباعدت:msa (12):
وبعدها على البراجون وخويي ذيبان اخذ عياله وانا اخذت عيالي ودعسه الى البيت وخذ من هالسواليف حتى وصلنا البيت
هذه علومي وسلامتكم صب القهوه ياولد
ان كان عندكم سواليف على قولة واحد مصري (يشوف الشعار يدخلون الحفلات وكل واحد اخر الليل ياخذ مبلغ 5000ريال قال والله لقول قصيده ان كان بيجيه شي مسكين) قال ياقماعه عندي كلام عاوز اءوله
هذا اللي عندي تمو حياك الله وحيا من زار وخفف:msa (28):

ينقل لمجلس الفرفشه والتسالي

نهاية اسبوع جميله بإذن الله

بالنسبه للمباراة تابعت القناة الرياضيه من الساعه ست واقول ياليت المباراه تجي بدري

واول ما صفر الحكم للبدايه سنترت الكوره للقحطاني ومررها للهزازي جيت ومسكته مع فنيلته وسحبت فيه الملعب لجل يرجع لي الكوره ويقوم الحكم يعطيني كرت اصفر فصاح الجمهور اووووووووه

زعلت وجلست مع اللعيبه الاحتياط وقلت للشلهوب وش رايك في المدرب وش فيه ما يلعبك قال شرايك العب بدلك قلت لا خلني اخذ فترة نقاهه وبعده برجع للملعب

المهم ان المدرب زعل قلت يابو الشباب اجلس كمل معنا بلوت المنتخب فايز بك والا بدونك

قال شايف كذا ( قلت افا عليك ) وجلس معنا وشربنا لنا بيره والظاهر انها بيرة الكوريين جايبينها معهم ويوم شافنا الحكم جا واعطا المدرب كرت اصفر المهم ان المدرب زعل وراح عند الجمهور ورحت انا اراضيه قلت يا مدربنا ترى الوضع كوره جا واحد من الجمهور قال يخوي انت اللاعب هولاكو قلت ايه معاك راس الحربه هولاكو

قال ممكن اخذ معك صوره قلت معليش انا ما اتصور مع ناس شيون صاح الجمهور باعلى صوته اوووووووووه

اول ما صاح الجمهور جا الحكم واعطا المشجع كرت اصفر وزعل المشجع وطلع من الملعب رحت وقلت له الله يهديك وش فيك تزل تراه تشجيع والسلام واذا على الصوره تعال نصور مع بعض

تصورنا ورحنا نحمض الفلم طلع الفلم هندي وزعل صاحب الاستديو ودف خوينا المشجع بعده جا الحكم واعطاه كرت اصفر وزعل الهندي صحت انا والمشجع اووووووووه وقنا بالطقاق ثم رجعنا للملعب

اول ما وصلنا وقفونا رجال الامن وقالوا ممنوع الدخول جيته وابرزت له بطاقتي الشخصيه وقلت معك اللاعب الشهير هولاكو قام وضحك هووووووههههه قلت شفيك وطالعت للبطاقه اثاريها اكة الديمن حاطها بجيبي لجل اغش في اللعب مع الاحتياط جا الحكم واعطا رجل الامن كرت اصفر زعل رجل الامن وركب الدوريه رحت عنده وقلت سلمات يا ابو الشباب الحين ادخل الملعب والا لا شغل السفتي ويجي الحكم يعطي الدوريه كرت اصفر وتزعل الدوريه وتجلس تلف على الملعب

المهم سمع اللعيبه صوت الدوريه قالوا اكيد هولاكو صاير له شي ويجون طايرين قلت سلماااات قالوا دامك سليم تعال كمل اللعب معانا وربي مشتاقين لك بالحيل قلت نذرن علي ما العب في الملعب دام ذالحكم عطاني كرتن اصفر لكن روحوا عسا دربكم خضر قالوا والله وتالله وبالله لا نلعب بدونك قلت اجل شرايكم نقلبها من كوره كيرم قالوا قداااااام قلت اجل انا وحسين عبدالغني ضد جنغ وبنغ قالوا ابشر قلت بالله يا المولد رح اجمع الحطب وانت يا هشيل اغسل البراد والفناجيل وضبطو لنا براد شاهي وخلو السكر وسط جا الحكم وصفر للبدايه وامسك المظرب والطم به جبهة الكوري ويغما عليه جابو له النقاله واخذو فيه فره داخل الملعب عشان يشوفه الجمهور ثم ودوه لمستشفى التخصصي جيت واستقبلتهم هناك ونزلنا المصاب ثم اجريت له عمليه في الركبه في اقل من خمس دقائق تماثل للشفاء ثم رجع للملعب وكملنا المباراه بالحركه البطيئه والي طلع فيها ان اول ما سحبت الهزازي مع شعره ركلت الحكم برجلي زعل واعطاني كرت اصفر وقال الجمهور اوووووووه

بعده زعلت وطلعت لدكة الاحتياط وباقي السالفه بالحركه البطيء ولما تخلص اللقطه اكمل لك قصة المباراه

اشكرك اخي الكريم على حرصك لهذا المنتدى وعلى اهتمامك المجيد لما تقوم به لهذا الصرح
تم وضع هذه المشاركه ليست من باب الفرفشه , انما تم وضعها في هذا القالب لتبادل الحديث مع الاحبة والاصدقاء واخوان لنا في قريتنا وذلك للاخذ والرد ومن باب التواصل الاجتماعي .
كما انها فكرة لتبادل الحديث وذلك اثناء الاجازه(الخميس والجمعه)* ليس الا
كما اشير هنا ان المنتدى اتسمت معالمه بالجديه والمعلوماتيه فاحببت ان اضيع شي من الاستمتاع وحسب رؤيتي يا اخي الكريم ان هذه المشاركه خير موطن لها بالمجلس العام وذلك خلال يومي الاجازه وتم اخذ هذه الفكره من منتديات عريقه لما فيها من مصلحه عامه للاعضاء
فان كنت ترى غير ذلك فلك ذلك لما تملكه من صلاحيه .

الوسام

موضوع رائع وشيق واؤيدك في مثل هذا الطرح الجميل
الله يعطيك العافيه
لك اجمل التحايا واعطرها